求求其是是但馬馬馬虎都會終老

有一天，醒來，我就開始以為，做甚麼東西都要好「知性」，都要「有嘢袋落袋」，讀本書看齣戲甚至只不過是說一句話兒，MAKE SENSE 與否不重要，重要是「靈性的修養」、一種長進。然後我閉門修正、改良自己，把自己思維推至一個位置。後來有空，我就望望身邊的每一個人，發現沒有一個是這樣子生活，沒有一個，結果我那思維系統唔覺唔覺打正了激進旗幟（為反而反，為與潮流作對而作出向後行的步伐），態度鮮明（刺眼）。

生活是不 MAKE SENSE 的，我們不需要為唔 MAKE SENSE 而嚎哭七天。記住不要一語道破，你看師奶婆仔們抱住一份蘋果看無線某某視帝視后揚言劇集收幾多幾多點的話就裸泳或者除八條褲的同時，邁克卻問，是不是等如說「收視好就除衫俾條嘢大家睇吓」。掃興就是當真實（不是現實）浮出水面的時候。談死亡從來都沒有市場，但硬是要談的話，說「去嘅時候唔痛咪福氣」是無死的信心保證（千萬別捉住對方討論大家切身的生死大事）。正路的幸福人生，就是不把現象說破；現象只是現象，就算天跌落嚟都只不過係天跌落嚟，失業破產無錢無女流產唔見咗隻襪諸如此類，只要你明白黃子華唱過的一句歌詞，求求其是是但馬馬馬虎都會終老，你就明白一切，你就明白如果人生是夢，其實根本無需解夢（才在說不要一語道破），MAKE 唔 MAKE SENSE，袋落袋定跌咗唔覺，WHY SO SERIOUS? WHO CARES? WHO IS ABLE TO CARE?

Poor U

快樂的深度

如果．癲

以近乎侮辱的姿態去叫其他人生性，唔好睇咁多無線，唔好睇咁多雀聖十分愛，唔好覺得錢咁重要，生命，你個LIFE才是重要的東西，多思考。身邊人們由看不過眼直到放棄任何新的爭拗，被說服，有時走過嚟問你聽過青山黛瑪未，唔係嗰個日本人係何韻詩新歌，好啱你。黃偉文寫話，旁人話你悲哀，不過在你眼中清醒才悲哀，繁忙才悲哀。咪就係咁之嘛，人被其他人生出嚟又無得揀，到最後（假設你唔信輪迴）死又無得揀，咁成班人喺一個資本社會裡面一齊過同一種人生然後被人讚上進其實係為乜。我不知道，我完完全全不知道。

幾多人話唔想唔敢退休或者發咗F有五十億都一定要做嘢，「如果唔係都唔知做咩好」，言下之意係咪話做人我都唔想咁但係橫掂做開咁咪做囉。林夕對梵高說唱，求存人人明白。我開始有些許眉目。我開冷氣，蓋被子；我又去大吃美食，然後柯爛屎。反覆不斷地進行這些 INEVITABLE CYCLES OF BEING。對上一次寫字已經是十月十一日，踏入了事業歲月，是真的，我比以前明白多了。TO THINK OR NOT TO THINK, THIS MAY NOT BE THE QUESTION.