愛到暈

我錫你因為我關心你，我關心你因為我緊張你，我緊張你因為我唔想你唔開心，我唔想你唔開心因為我愛你，然後我開始講唔到落去，因為有D嘢叫感覺，我哋覺得果D嘢無得一直再解落去，所以講到我愛你，就已經好終極。好正路，大家都明。後來你見到一D人，佢哋話個世界係圍住佢哋而轉動，佢哋又話你都算唔錯，都算係咁，但就因為你無完全離開自己個星體去圍住佢轉動，佢唔識俾D愛你。

忽然之間，你就懷疑喺你生出嚟嗰刻開始，其實係咪有責任去圍住人哋轉動，兼且唔可以立心不良地祈望有回報。換句話講，你天生就一條食屎命，想久唔久有粒糖食下你都簡直係發緊夢。

食過屎，就好似入教堂受過洗咁，你覺得你成熟咗，你唔會再咁易大驚小怪成日喺度呱呱叫。點知又有果D人出現，佢又再同你講，你都唔係圍住佢轉動，佢唔識俾愛你。你成熟咗，所以你今次就識話，係呀你唔係生出嚟負責圍住佢轉動。你以為你終於知道自己做緊乜講緊乜，點知果D人突然好慘地喊起上嚟，你先至明白，你一世都唔會成熟，俾本四十二章經你俾本道德經你都無用，你根本生出嚟都唔係要圍住佢轉動，你根本生出嚟係蠢啫。