蟻值幾多我就值幾多

原來真沒有人相信自己是螻蟻，或者應該話，自己的價值就等如螻蟻的價值。不知道蟻是怎樣溝通，但應該比人的暢順。可能蟻都嗌好多交，但我們看不明白，只見他們行行行，有時一隻自己行，有時上萬隻一齊竄動，總之看上去都像是相安無事，一片和諧面貌。人好似也差不多，有時溝通不成問題，有時聽唔明，就留一隻眼閉著，夾硬照溝，又通倒，勁神奇囉。

只要不執著，在溝通、開口講嘢時把腦袋藏著，吝嗇點，它就不那麼輕易會見光死。人哋同你講廢話，你就無問題，照樣應付自如。橫豎你又不是我肚裡面條蟲，我跟你只有越來越了解，了解到原來我哋係咁鬼唔同。溝通是一種很玄的東西，玄的東西，最好其實係完全唔好去講佢唔好去逗佢，因為太玄，講得越多多數就錯得越多。錯得多，就慢慢明白若要人似你除非兩個你。你試試求其捉個師奶問她懂不懂得溝通，她會答你你都忽嘅，問乜鬼呀，我買豬肉次次都有講價都講得贏。你明白沒有，就是生活，就是做人，溝通都不過為了過日辰，唔好話成世人流流長，有時一日，一個鐘都像路軌一樣長。有時則為了生存，就講價，擦鞋，奉成，喺戲院唔敢鬧後面條友就陰聲細氣咀咒下佢。

俗語話螻蟻尚且偷生，我懷疑螻蟻根本無偷，純粹係我哋屈佢哋，而我哋可以屈佢哋，大概係因為佢哋無執著、無尊嚴（就算有，佢哋都無 BARGAINING POWER）。那位姓黃的棟篤笑智者說過，「我未曾遇過一個對我嚟講溝通無問題嘅人 ﹣ 無論男女」。充滿了執著，因為他是一個人，我們是人。執著就容易不快樂，但大部份人同時又唔敢死，這不叫偷生叫甚麼。